طريقة الشنطة الزجزاج

أول مشروع ليا بعد طول توقف عشان كده الشنطة دي هاتبقى عزيزة على قلبي واحتمال البسها لغاية لما تدوب وتكرهني.
طريقة الشنطة خليط من باترون بالإنجليزي وباترون تاني بالصور، انا معجبنيش جزء فى الباترون المكتوب عشان مكانش واضح ففضلت اني ادور على باترون مرسوم وساعرض عليكم هنا الباترونين واشرح الطريقة اللي جمعت بينهما فيها وطلعت الشنطة كده.
لينك الباترون المكتوب: اضغط هنا
الباترون المرسوم

الغرز المستخدمة:

• الدائرة السحرية، انا بعمل بدالها عدد سلاسل قليل واقفلها واشتغل فيها.
• المنزلقة Sl St.
• العمود DC.
• العمود بلفتين TC.
• عمود بلفتين مع التنقيص TC2TOG.
• عمود بلفتين مع التزويد TC3TOG.
• حشو SC.
  
  ملحوظة :كل غرزة مزودة بهايبر لينك لفيديو موضح ليها.

الخطوات:
الجزء الاول من الشنطة بلون واحد، هنا اللون البني  (قاعدة الشنطة).

1. 3 سلاسل بدل أول عمود، ثم 7 عواميد ثم نغلق اخر غرزة في السطر بمنزلقة فى اول غرزة.
2. 3 سلاسل بدل أول عمود، ثم عمود في نفس المكان، و 2 عمود في كل غرزة لأخر السطرم نغلق اخر غرزة في السطر بمنزلقة فى اول غرزة.
3. 3 سلاسل بدل أول عمود، ثم عمود في نفس المكان، الغرزة التالية عمود، ثم عمودين في الغرزة التالية، وهكذا لأخر السطر، غرزة عمودين، وغرزة عمود 2/ 1 / 2 ثم نغلق اخر غرزة في السطر بمنزلقة فى اول غرزة.
4. 3 سلاسل بدل اول عمود، ثم عمود في نفس المكان، الغرزة التالية عمود، الغرزة التالية عمود، ثم عمودين في الغرزة التالية، وهكذا لأخر السطر، غرزة عمودين، ثم غرزتين كل غرزة عمود واحد، وبعد كده عمودين، وهكذا 2 /1/ 2
   ثم نغلق اخر غرزة في السطر بمنزلقة فى اول غرزة.
5. 3 سلاسل بدل اول عمود، ثم عمود في نفس المكان، ثم باقي السطر عمودين في كل غرزة، ثم نغلق اخر غرزة في السطر بمنزلقة فى اول غرزة.
6. 3 سلاسل بدل اول عمود، ثم باقي السطر عواميد عادي في كل غرزة، ثم نغلق اخر غرزة في السطر بمنزلقة فى اول غرزة.
7.  4 سلاسل بدل اول عمود بلفتين، وباقي السطر عواميد بلفتين،ثم نغلق اخر غرزة في السطر بمنزلقة فى اول غرزة.
   ملاحظة: ممكن نوقف هنا ونبدأ بغرزة الزجزاج لكن انا كملت كمان عشان الشنطة تكون اكبر
8. 4 سلاسل بدل اول عمود بلفتين، ثم عمود بلفتين ثاني فى نفس المكان، وباقي السطر عمودين بلفتين في كل غرزة، ثم نغلق اخر غرزة في السطر بمنزلقة فى اول غرزة.
9. 4 سلاسل بدل اول عمود بلفتين، وعمود بلفتين في كل غرزة لأخر السطر، ثم نغلق اخر غرزة في السطر بمنزلقة فى اول غرزة.(ممكن نكرر السطر ده لغاية لما نوصل للحجم اللى عايزينه، لو عايزين شنطة عملاقة، انا وقفت هنا).
10. هنبدأ هنا في غرزة الزجزاج من الباترون المرسوم مع شوية تعديلات من عندي.
    
    4 سلاسل بدل اول عمود بلفتين، 3 عواميد بلفتين كل عمود في غرزة، في الغرزة الخامسة هانعمل تنقيص غرزتين من الاسفل في غرزة واحدة، ثم نكرر ذلك مرة اخرى في الغرزة التالية، 3 عواميد بلفتين  كل عمود في كل غرزة من السطر السابق، في الغرزة التالية ها نعمل غرزتين بلفتين في غرزة واحدة من السطر السابق، ثم نكرر ذلك فى الغرزة التالية، يعني الشكل هايكون 1/1/1/ تنقيص/ تنقيص/ 1/ 1/ 1/ تزويد /  تزويد، ونعيد الكرة تاني، ثم نغلق اخر غرزة في السطر بمنزلقة فى اول غرزة.
11. نكرر السطر السابق لغاية لما نوصل للإرتفاع اللى عايزينه مع تغيير الألوان بالترتيب المناسب لينا، بس الشنطة لازم تكون من ألوان متعددة عشان تبان الغرزة، وبالنسبة لتغيير الألوان ده فيديو يوضح تكنيك لطيف لتغيير الألوان فى الكروشية.
    
12. نبدأ من هنا تقفيل الشنطة.
    في السطر ده نعمل عمود بلفتين في كل غرزة لأخر السطر.
13. نبدأ نقلل من حجم الشنطة، عشان كده السطر ده هايكون كله تنقيص، هناخد كل غرزتين مع بعض فى غرزة واحدة، والغرزة المستخدمة في السطر ده العمود بلفتين.
14. نقسم عدد الغرز إلى اربعة عشان نعمل اليدين ، مثلا لو الغرز عندك 64، هاتكون النتيجة 16، إذا 8 غرز قبل اليد الاولى، ثم 16 اليد الاولى، 16 بعد اليد الأولى، ثم اليد الثانية، ثم 8 بعد اليد الثانية.
    غرزة بداية السطر ثم اول 8 غرز ها نشتغل فيهم حشو، ثم نبدأ نعمل سلاسل بطول اليد سواء 70 او 60 سلسلة، ونفوت من عدد 16 غزرة، وبعدين نكمل حشو 16 غرزة، وبعدين نعمل نفس عدد السلاسل تاني لليد الثانية، وبعدين 8 غرز حشو ونقفل، كده بقى عندنا ايدين للشنطة.
15. حشو على كل غرزة بما فيهم سلاسل اليدين.
16. تكرار السطر السابق ثم نغلق ونقطع الخيط.
17. عشان نجمل الشنطة ممكن نعمل غرزة داخلية، يعني نشبك الخيط في الغرز تحت اليد، ثم نشتغل غرزة حشو داير ما يدور اليد من الدخل، ونقطع الخيط ونكرر في الناحية الأخرى.
18. كده الشنطة خلصت وباقي نخفي الخيوط وممكن نستعمل الفيديو ده عشان نتعلم نخفي الخيوط بطريقة نظيفة وشيك.

طريقة علامة كتاب القلوب

مشروع صغير وبسيط حبيت اعمله اشجع نفسي اكمل الرواية بما ان نفسي مسدودة عن القراءة، وفي نفس الوقت انبسط بإنجاز فى الكروشية بما ان مشروعي الاساسي اخد وقت طويل.

الـ Book Mark او علامة الكتاب اللى بنحدد بيها وصلنا قد ايه في الكتاب اللى بنقراه، سهلة وبسيطة جدا.

الخطوات:

1. 2 سلسلة.
2. 6 غرز حشو في اول سلسلة ونقفل اول غرزة فى اخر غرزة.
3.  2 سلسلة، 2 غرزة نصف عمود في كل غرزة حشو. (عدد الغرز هايكون 12 بعد السطر ده).
4. 2 سلسلة، عمود في الغرزة الاولى، عمودين في الغرزة الثانية، عمود فى الغرزة الثالثة، 2 عمود في الغرزة التالية، عمود في الغرزة التالية، 2 عمود في الغرزة التالية، غرزة حشو في الغرزة التالية، 2 عمود في الغرزة التالية، عمود في الغرزة التالية، 2 عمود في الغرزة التالية، عمود في الغرزة التالية، 2 عمود في الغرزة التالية.
   (باختصار، عندنا 12 غرزة من السطر السابق، هنشتغل اول ست غرز عمود ثم 2 عمود، ثم عمود لغاية لما يخلصوا الست غرز، ثم غرزة حشو، ثم نكرر نفس النسق 2 عمود، عمود لغاية لما نوصل لغرزة البداية).
5. 2 سلسلة، عمود في غرزة البداية، نصف عمود في كل من الغرزتين التاليتين، في الغرزة التالية (نصف عمود+ عمود)، عمود في الغرزة التالية، (عمود + عمود بلفتين) في الغرزة التالية، ثلاث عواميد بلفتين في الغرزة التالية، (عمود بلفتين + عمود) في الغرزة التالية، نصف عمود في الغرزة التالية، غرزة منزلقة على غرزة الحشو في السطر السابق، نصف عمود في الغرزة التالية، (عمود+ نصف عمود) في الغرزة التالية، نصف عمود في كل غرزة حتى النهاية. 
     
6. 70 سلسلة.
7. هانبدأ في صنع القلب الصغير
   في الغرزة الثالثة من نهاية السلسلة (3 عمود بلفتين+ عمود)، في الغرزة التالية 2 عمود، في الغرزة التالية حشو، هنشتغل هنا على نفس الغرزة لكن من الناحية التانية، لأن القلب ده مصنوع من جزئيين مقابلين لبعض، احنا كده خلصنا نص هنشتغل على النص الثاني، نبدأ بحشو، ثم 2 عمود، ثم (3 عمود بلفتين + عمود) ونقفل القلب من المنتصف بغرزة المنزلقة. 
8. كده علامة الكتاب انتهت بأبرة الكنافاه ناخد بواقي الخيوط ونخفيها بين الغرز.
   

المصدر: اضغط هنا

طريقة البندانة القطن

انا مش فاكرة عملت البندانه ديه ليه، هدية لواحدة صاحبتي ولا ليا ولا للولو وطلعت كبيرة، المهم إنها طلعت حلوة خالص ومشروع سهل ممكن يخلص وانت ببتفرجي على حلقة واحدة من المسلسل .
استخدمت فيها خيط قطن مصري، ويفضل ان تستخدمي فيها القطن من اي نوع عشان الغرزة تبان بشكلها الاساسي.
فكرة البندانة اننا بنعمل مربعات وفراغات، اعلى المربعات بنشتغل سلاسل، وفي الفراغات بنشتغل عواميد، السطر التالي هايكون العكس، وهكذا.
توضيح: السطر اللي بيبدأ بعواميد السطر اللي فوقه يبدأ ب ٦ سلاسل، والسطر اللي بادئ بفراغ السطر اللي فوقه نشتغل في الفراغ مباشرة.

خطوات البندانة:

1. 12 سلسلة.
2. اول ثلاث سلاسل نعتبرهم اول عمود، ثم عمود في السلسلتين الرابعة والخامسة.
3. ثلاث سلاسل فى الهواء، نفوت من اسفلهم ثلاث سلاسل، ثم ثلاث عواميد في الثلاث سلاسل الباقيين(يعني احنا عندنا 12 سلسلة، اول ثلاثه اعتبرناهم اول عمود، 2 سلسلة عملنا عليهم عواميد، 3 سلاسل من غير شغل، 3 سلاسل عملنا عليهم عواميد).
4.  السطر الثاني، نبدأ ب 6 سلاسل، ثلاثة هنعتبرهم عمود البداية، ثم في الفراغ اللى فى النص اللى سبناه فى السطر السابق هنعمل 3 عواميد، ثم 3 سلاسل فوق العواميد فى نهاية السطر.
5. السطر الثالث، هايكون السطر اسفله بدايته فراغ، نشتغل فيه ثلاث عواميد، الجزء اللى فيه عواميد من الاسفل هنشتغل عليه ثلاث سلاسل، ثم على الفراغ الثالث نعمل ثلاث عواميد.
6. نكرر بنفس الاسلوب حتى الطول المطلوب، انا اشتغلت طول معقول، والباقي قفلته بشريطة ستان.
7.  حول البندانة هنعمل غرزة تزيينه، هنثبت الابرة فى الركن ونشتغل غرزة حشو داير ما يدور البندانة لغاية لما نرجع لنقطة البداية.
8. السطر التالي هنعمل حشو، نفوت غرزتين حشو وتعملي 6 عواميد فى الغرزة الثالثة، وتفوتي غرزتين وتعملي حشو، ثم تفوتي غرزتين وتعملي 6 عواميد فى الغرزة الثالثة، وهكذا لنهاية البندانة.
9. كده البندانة خلصت وممكن تحطي شرائط ستان تربطي بيهم الطرفين من الخلف، او تعمليه على قد الرأس وتقفلي الجزئين سوا بغرزة الحشو.

طريقة بلوزة الفراولة للأطفال

بلوزة الفراولة كانت من التحديات اللى قابلتني، عجبتني جداً لكن للأسف مالهاش باترون، وبالتالي كان لازم اخمن طريقة توصلني لأقرب شكل للغرزة الصدر بما أن باقي البلوزة واضح إنها عواميد ثلاثية بسيطة.
في الوقت ده كان بقالي اكتر من سنة بشتغل كروشية وعرفت قد ايه هو مرن وممكن نغير فيه وبرضه الشكل يكون جميل، عشان كده اخترت غرزة تدي اشكل البارز وبسيطة بالنسبة لي برضه، وطلعت في الاخر بلوزة الفراولة الجميلة بالشكل ده.

فكرة البلوزة:
البلوزة من جزئيين، الصدر باللون الاخضر من غرزة بارزة، والباقي من اللون الاحمر، استخدمت ناكو ستان للصدر، واليز الحرير لباقي البلوزة، واستخدمت شلة وشلة لأن الحجم صغير.

الخطوات:

صدر البلوزة:
صدر البلوزة بشكل مستطيل مائل الاضلاع اقل من الاعلى عن منطقة اسفل الابط.

1. بالمازورة قيسي تحت الابط بمسافة صغيرة ، وابدئي اعملي سلسلة بنفس الطول، واقفلي اول غرزة مع اخر غرزة.
2. السطر الاول: ثلاث غرز بداية السطر، عمود فى كل سلسلة إلى النهاية.
3. السطر الثاني: عمود أمامي ، عمود عادي، عمود امامي ، عمود عادي لأخر السطر.
4. السطر الثالث: على العمود الامامي عمودد عادي ، وعلى العمود العادي عمود امامي، بالتبادل لأخر السطر.
5. السطور التالية، تكرار السطر الثاني والثالث حتى الوصول للأبط، ثم نقفل الشغل.
6. في الخطوة التالية هنقسم البلوزة نصين، نص امامي ونص خلفي، على النص الامامي هنحدد المسافة اللي هنطلع بيها الصدر، يمكن القياس هنا على الطفلة او على بلوزة ليها بموديل مشابه، انا بفضل القياس على الملابس للدقة.
7. بعد التحديد حطي علامات زي دبابيس او قطعتين خيط تربطيهم بالعرض بتاع الصدر من الامام والخلف، وتأكدي من التطابق.
8. ثبتي الخيط عند اول علامة، واطلعي الثلاث سلاسل لبداية الصدر وابدئي كملي زي المنطقة اسفل الباط، الغرزة الامامية على الغرزة العادية، الغرزة العادية على الغرزة الامامية.
9. في الخطوة ديه مش زي بداية الصدر هانشتغل داير ما يدور، أحنا هنا هنشتغل رايح جاي.
10. كل سطر لأعلى هننقص غرزة فى البداية وغرزة فى النهاية، وذلك بعمل غرزتين مع بعض فى غرزة واحدة.
11. نكمل رايح جاي لغاية نهاية الصدر بالطول اللى عايزينه.
12. نكرر الخطوات من 8-10 نكررها في الضهر.

 الحمالات:
الحمالات بسيطة للغاية، نبدأ من احد اطراف مستطيل الصدر، ونعمل سلسلة طويلة بالطول اللى نحبه، ونرجع تاني عليها بغرزة الحشو ونقفلها فى النهاية، ونكرر الخطوة ثلاث مرات، بحيث يكون عندنا اربعة شرائط نربط كل اتنين سوا زي الصورة.

باقي البلوزة:

1. باقي البلوزة من غرزة العمود زي ما قولت فى البداية، الفكرة العامة هي إننا بنشبك الخيط الاحمر فى سلسلة بداية الصدر، بحيث إننا هنا هنشتغل بالمقلوب ويكون الجزء الاخضر لتحت، ونبدأ نعمل في كل غرزة عمود.
2. كل سطر هنزود في بدايته غرزتين او تلاته، عشان نضمن إن البلوزة تنزل متسعة ومريحة لجسم الطفل.
3. نكمل لغاية الطول اللي عايزينه بعمل العواميد والتزويد فقط، وبعدين نقفل اخر غرزة ونخفي الخيط.

ممكن نجمل البلوزة في نهايتها بأي غرزة نحبها او بسطر من غرزة الحشو. 

غرزة العمود double crochet :

 غرزة العمود الامامي front  post double crochet stitch: 

غرزة الحشو :single crochet stitch 

التزويد:

التنقيص: